مکتوب اول قسط ۹ کی تشریح

 

فنا اور بقا کا مفہوم

اَلْفَنَاءُ عَدَمُ رُوْیَۃِ الْعَبْدِ لِفِعْلِہ بِقِیَامِ اللہِ عَلیٰ ذَالِکَ وَ الْبَقَاءُ رُوْیَۃُ الْعَبْدِ قِیَامُ اللہِ عَلیٰ کُلِّ شَیْی ءِِ[۱]

(ترجمہ: فنا یہ ہے کہ بندہ ذاتِ حق کے قیام اور غلبہ کے سبب اپنے فعل کو نہ دیکھے اور بقا یہ ہے کہ ہر چیز پر ذاتِ حق کا قیام اور غلبہ مشاھدہ کرے)

بینہ ۱۱

کثرتِ اذکار و نوافل و اِتباعِ سُنّت و شریعت کے التزام کے بعد محض عنایتِ خداوندی سے سالک کو مَاسویٰ اللہ کا ایسا نسیان ہوجاتا ہے اور اس پر ذاتِ حق تعالیٰ کا یہاں تک غلبہ ہوجاتا ہے کہ سالک استغراق فیی الربوبیّت کی لذّت سے آشنا ہوکر اپنے آپ کو اسی کے حوالے کردیتا ہے۔

یہی مفہوم لَایَزَالُ عَبْدِیْ یَتَقَرَّبُ اِلَیَّ بِالنَّوَافِلِ [۲] (ترجمہ: جاوید ہوجاتا ہے بندہ کثرتِ نوافل سے) صوفیائے کرام فرماتے ہیں

اَوصافِ مذمومہ کا سقوط فنا کہلاتا ہے جیسا کہ اوصافِ محمودہ کا وجود بقا کہلاتا ہے (فَافُھَمْ)

حیاتِ انبیاء و اولیاء

جب بندگانِ خاص کے لطائف ایمان و اعمالِ صالحہ کی برکت سے اپنے اصل کیطرف عُروج کرتے ہوئے عالمِ وجوب میں رسائی حاصل کرلیتے ہیں اور انہیں محض عنایتِ ایزدی کے ساتھ فنا و بقا سے مشرف کیا جاتا ہے اور ان کو اسماء و صفات اور ذات کی تجلیات سے وجودِ موہوبِ حقّانی ہوتا ہے تو بمطابق آیۃ کریمہ مَنْ عَمِلَ صَـٰلِحًۭا مِّن ذَكَرٍ أَوْ أُنثَىٰ وَهُوَ مُؤْمِنٌۭ فَلَنُحْيِيَنَّهُۥ حَيَوٰةًۭ طَيِّبَةًۭ [۳](ترجمہ:جو شخص نیک اعمال کرے گا مرد ہو یا عورت وہ مومن بھی ہوگا تو ہم اس کو (دنیا میں) پاک (اور آرام کی) زندگی سے زندہ رکھیں گے)

انہیں پاکیزہ زندگی عطا کی جاتی ہے اور وہ زندہ جاوید ہوجاتے ہیں ان کے لطائفِ حیاتِ دائمی سے سرفراز ہوجاتے ہیں اور ان کے اجسام بربنائے لطافت ارواح کے مرتبوں پر فائز ہوجاتے ہیں اور وہ تا قیامت اپنی قبور میں زندہ و سلامت رہتے ہیں۔

حضرت قاضی ثناء اللہ مجدّدی تحریر فرماتے ہیں کہ یہ حکم شہداء کے ساتھ خاص نہیں کیونکہ انبیاء اور صدیقین ان سے زیادہ بلند مرتبوں والے ہیں جیسا کہ حدیث پاک میں ارشاد فرمایا گیا ہے۔

اِنَّ اللہَ حَرَّمَ عَلیَ الْاَرْضِ اَنْ تَاکُلَ اَجْسَادَ الْاَنْبِیَاءِ فَنَبِیُّ اللہِ حَیُُّ یُرْزَقُ [۴](ترجمہ: خدا نے زمین پر انبیائے کرام ع کے اجسام کو کھانا حرام فرما دیا ہے پس خدا کے نبی زندہ ہوتے ہیں اور رزق دئیے جاتے ہیں۔)

حدیثِ مذکور کے مطابق انبیاء کے اجسام گلنے سڑنے اور ضائع ہونے سے محفوظ ہوجاتے ہیں اور انہیں قبروں میں کھانے پینے والی زندگی عطا ہوتی ہے۔

شبِ معراج مسجدِ اقصیٰ میں انبیاء و مرسلین علیہم السلام کا اجتماع اور سرورِ عالم صلی اللہ علیہ وآلہ وسلم کی اِقتداء میں نماز ادا فرمانا اس امر پر واضح دلیل ہے کہ وہ اپنی قبروں میں جسمانی طور پر زندہ ہیں نمازیں ادا فرماتے ہیں، رزق کھاتے ہیں اور عرش و فرش پر جہاں چاہئیں تصرف فرماتے اور آتے جاتے ہیں جیسا کہ سرورِ دو عالم صلی اللہ علیہ وآلہ وسلم کا ارشادِ گرامی ہے۔

اَلْاَنْبِیَاءُ اَحْیَاءُُ یُصَلُّوْنَ فِیْ قُبُوْرِھِمْ [۵](ترجمہ: انبیاء اپنی قبروں میں زندہ ہوتے ہیں اور اپنی قبروں میں نمازیں پڑھتے ہیں)

نیز حدیث پاک میں ہے

مَرَرْتُ عَلیٰ مُوْسیٰ ...... وَھُوَ قَائِمُُ یُّصَلِّیْ فِیْ قَبْرِہ [۶](ترجمہ: میں نے شبِ معراج موسیٰ علیہ السلام کو اپنی قبر میں کھڑے نماز ادا کرتے دیکھا) ظاہر ہے نماز جسمانی طور پر ہی ادا ہوسکتی ہے اور یہ جسم کی صفت ہے لہٰذا قبروں میں انبیاء کی حیات "جسمانی" ہی مانی جائے گی۔ اسی طرح بعض روایات میں آیا ہے کہ عُلماء، حُفّاظ اور موذّنین کے اجسام بھی قبروں میں سالم رہتے ہیں۔ [۷]

بینہ ۱۲

واضح ہو کہ انبیاء کرام کے بارے میں تو یہ عقیدہ نصِّ حدیث سے ثابت ہے کیونکہ اولیائے کرام، انبیائے عظام کے تابع اور نائب ہوتے ہیں۔ اصولی طعر پر متبوع اور مناب کے تمام کمالات ، تابع اور نائب کو بطورِ اتباع و نیابت حاصل ہوجاتے ہیں (کَمَا لایخفیٰ علیٰ ارباب العلم)

نیز امت کے تمام اصحابِ سلوک و معرفت کا مزارات پر جانا، سلام کہنا اور ان سے سلام کا جواب سُننا، مراقبات کے ذریعے اہل قبور سے فیوض و برکات حاصل کرنا، قبریں کھلنے پر ان کے جسموں کو سلامت دیکھنا سلفِ صالحین سے لیکر آج تک روز مرہ کے معمولات ، مشاہدات و تجربات اور تاریخی واقعات سے تسلسل اور تواتر کے ساتھ عقلاً و نقلاً ثابت ہے اور اس پر اکابرینِ اُمت کا تعامل بجائے خود بمطابقِ حدیث مَارَاٰہُ الْمُوْمِنُوْنَ حَسَنًا فَھُوَ عِنْدَ اللہِ حَسَنُُ [۸](ترجمہ: جو اہلِ ایمان کو متفقہ پسند ہے وہ خدا کو بھی پسند ہے) دلیلِ شافی و سندِ کافی ہے۔ 

_________________________________________________________________________________

۱۔ کتاب التعریفات ص ۱۱۲

۲۔ صحیح بخاری ص ۹۶۳ ج ۳

۳۔ النحل ۹۷

۴۔ ابنِ ماجہ ص ۱۱۹، مشکوٰۃ ص ۱۲۱

۵۔ مسند ابویعلیٰ ص ۲۱۶ ج ۳، مجمع الزوائد ص ۲۱۴ ج ۸

۶۔ صحیح مسلم ص ۲۶۳ ج ۱، نسائی ص ۱۹۵ ج ۱

۷۔ عَنِ النَّبِیِّ صَلَّی اللہُ عَلَیْہِ وَاٰلِہ وَسَلَّمَ اِذَا مَاتَ حَامِلُ القُرْآنِ لَوْحیٰ اللہُ الْاَرْضِ اَنْ لَّاتَاْکُلِیْ لَحْمَہ قَالَتْ اِلٰھِیْ کَیْفَ اٰکَلُ اَحْمَہ وَکَلَامُکَ فِیْ جَوْفِہ۔ (کنزالعمال ص ۵۵۵ ج ۱، الدیلمی ص ۲۸۴ ج ۱ (اَلْمُوَذِّنُ) وَاِنْ مَاتَ لَمْ یُدَوَّدْ فِیْ قَبْرِہ(کنزالعمال ص ۶۸۶، الدیلمی ص ۱۹۵ ج ۴، طبرانی کبیر ص ۳۲۲ ج ۱۲))
۸۔ طبرانی کبیر ص ۱۱۳ ج ۹